پاکستان کرکٹ بورڈ کے ایم ڈی وسیم خان کو 5 لاکھ روپے مالیت کا کریڈٹ کارڈ جاری کرنے کے لئے بورڈ آف گورنرز سے منظوری حاصل کیے جانے کا امکان ہے۔کوئٹہ کی میٹنگ میں اگر بورڈ آف گورنرز نے منظوری دے دی تو وسیم خان کو بزنس اخراجات کے لئے پی سی بی کی جانب سے پانچ لاکھ روپے مالیت کا کریڈٹ کارڈ جاری کیا جائے گا۔دستاویز کے مطابق بینک نے کریڈٹ کارڈ جاری کرنے کے لئے بورڈ آف گورنرز کی منظوری کی شرط کو لازمی قرار دے دیا ہے جب کہ پی سی بی کراچی آفس کے لئے ایک اور بینک میں اکاؤنٹ کھولا جارہا ہے۔اس سے قبل پی سی بی ہیڈ کوارٹر اور کراچی آفس کے بینک اکاونٹ الگ الگ بینکوں میں تھے جس کی وجہ مشکلات پیش آرہی تھی اور نیا اکاونٹ کھولنے کے لئے بھی بورڈ آف گورنرز سے اجازت درکار ہوگی۔پاکستان کرکٹ بورڈ کے نئے آئین میں اصلاحات آنے اور ترامیم مکمل ہونے کے بعد اس بات کے امکانات روشن ہیں کہ پی سی بی بورڈ آف گورنرزمیں ڈپارٹمنٹس کی نمائندگی ختم ہوجائے گی۔اسد علی خان کی سربراہی میں پی سی بی ٹاسک ٹیم نئے آئین کی تیاری پر کام کررہی ہے اور اس آئین میں صوبائی ٹیموں کو فرسٹ کلاس سسٹم میں لانے کے لئے آئینی کور دیا جائے گا۔نئے آئین کا مسودہ منظور ہونے کےلئے وزارت قانون کے توسط سے بورڈ کے سرپرست اعلی اور وزیر اعظم عمران خان کے پاس جائے گا۔پی سی بی بورڈ آف گورنرز کے ایجنڈے کے مطابق اجلاس میں ڈومیسٹک کرکٹ کی ٹاسک فورس اور آئین کی ترامیم کرنے والی ٹاسک فورس اپنی اپنی رپورٹس پیش کریں گے۔
ایم ڈی پی سی بی کیلئے5 لاکھ روپے مالیت کے کریڈٹ کارڈ کی منظوری کا امکان
