مسلم لیگ (ن) کے صدر شہباز شریف تو 2 روزہ ‘مشن کراچی’ کے بعد واپس لاہور لوٹ گئے لیکن گزشتہ روز میڈیا سے گفتگو میں کراچی کو ‘کرانچی’ کہنے اور ‘پان’ کھانے والے ‘بہن بھائیوں’ کا تذکرہ کرکے شہرِ قائد کے باسیوں کو اچھا خاصا ناراض کرگئے۔واضح رہے کہ گزشتہ روز ممکنہ طور پر ایک رپورٹر نے کراچی کو ‘کرانچی’ کہہ کر شہباز شریف سے کوئی سوال کیا، جس پر صدر مسلم لیگ (ن) نے جواب دیا کہ ‘ہمارے جو بھائی بہن پان کھانے والے ہیں، ان کے کرانچی کو میں لاہور بناؤں گا اور جو کراچی میں رہتے ہیں، ان کو میں کراچی انشاء اللہ لاہور سے بہتر بنا کر دوں گا’۔پاکستان تحریک انصاف (پی ٹی آئی) کے رہنما عمران اسماعیل تو اس بات پر باقاعدہ پھٹ پڑے اور انہوں نے طنز و تنقید سے بھرپور ایک ویڈیو پیغام جاری کردیا۔
Play Video