ملک کے 10 کروڑ 50 لاکھ عوام کے علاوہ سیاسی قائدین اور اہم شخصیات بھی حق رائے دہی استعمال کررہی ہیں۔
عمران خان
پاکستان تحریک انصاف کے چیئرمین عمران خان نے اسلام آباد میں اپنا ووٹ کاسٹ کیا۔ میڈیا سے بات کرتے ہوئے عمران خان نے کہا کہ سارے پاکستانی آج ووٹ ضرور ڈالیں، ووٹ ڈالنا آپ کا فرض ہے اور اپنے ملک کے لیے یہ فرض ادا کریں، اللہ نے جو موقع دیا ہے اس موقع کو ضائع نہ کریں، میرے لیے نہیں بلکہ آنے والی نسلوں کے لیے گھر سے ضرور نکلیں۔
چیف جسٹس پاکستان
چیف جسٹس پاکستان میاں ثاقب نثار نے لاہور کے گورنمنٹ ماڈل گرلز ہائی اسکول برکت مارکیٹ میں اپنے اہل خانہ کے ہمراہ حق رائے دہی کا استعمال کیا۔
فاروق ستار
ایم کیو ایم پاکستان کے رہنما فاروق ستار اور ان کی اہلیہ نے کراچی کے علاقے پی آئی بی کالونی میں ووٹ کاسٹ کیا، اس موقع پر انہوں نے کہا کہ نامساعد حالات اور مشکلات کے باوجود ہم حوصلہ کرکے میدان میں اترے، ملک میں 20 انتظامی یونٹس کی حمایت کریں گے۔
مولانا فضل الرحمان
مولانا فضل الرحمان نے ڈیرہ اسماعیل خان میں اپنے آبائی گاؤں عبدالخیل پنیالہ میں حق رائے دہی استعمال کیا۔ ووٹ دینے کے بعد میڈیا سے بات کرتے ہوئے انہوں نے کہا کہ ووٹ ایک امانت ہے جو اہل کے سپرد کرنا ضروری ہے، اس کو ضائع نہ کریں، ووٹ دینے سے ملک کے مستقبل کا بہتر فیصلہ ہوگا۔ ووٹر بھی دیانت دار امیدوار کا چناؤ کرے۔
شہباز شریف
مسلم لیگ (ن) کے صدر میاں شہباز شریف نے لاہور کے علاقے ماڈل ٹاؤن میں ووٹ ڈالا، اس موقع پر انہوں نے کہا کہ نوازشریف اور مریم نواز نیب عدالت کے متنازع فیصلے کے باوجود گرفتاری دینے آئے ہیں، پاکستانیوں کی اکثریت مسلم لیگ (ن) کو ووٹ دینا چاہتی ہے، انشا اللہ جیت کر پاکستان کی خوشحالی کا سفر شروع رکھیں گے بھاشا ڈیم اور سستے گھر بنائیں گے۔
آصف زرداری
پاکستان پیپلز پارٹی کے شریک چیئرمین آصف علی زرداری نے نوابشاہ کی ایل بی او ڈی کالونی میں واقع پولنگ اسٹیشن نمبر 13 پر اپنا ووٹ کاسٹ کیا۔
بلاول بھٹو زرداری
پاکستان پیپلز پارٹی کے چیئرمین بلاول بھٹو زرداری نے نوڈیرو کے شہید میجر مجاہد بوائز اسکول پولنگ اسٹیشن میں ووٹ کاسٹ کیا۔
آصفہ اور بختاور بھٹو زرداری
بے نظیر بھٹو کی دونوں صاحبزادیوں آصفہ بھٹو زرداری اور بختاور بھٹو زرداری نے نوابشاہ میں ووٹ کاسٹ کیا۔
نواز شریف، مریم نواز اور کیپٹن (ر)صفدر
ملک میں جہاں ایک جانب کروڑوں پاکستانی اپنے آئندہ نمائندوں کا انتخاب کررہے ہیں وہیں ہزاروں افراد ایسے بھی ہیں جو مختلف وجوہات کی بنا پر ووٹ کا حق استعمال نہیں کرسکیں گے ان میں مسلم لیگ (ن) کے قائد نواز شریف، ان کی صاحبزادی مریم نواز اور داماد کیپٹن ریٹائرڈ صفدر بھی شامل ہیں، یہ تینوں اہم شخصیات اس وقت جیل میں ہیں اور اپنا حق رائے دہی استعمال نہیں کرسکتے۔