کراچی: جعلی اکاؤنٹس کے ذریعے منی لانڈرنگ کیس کی سماعت کے دوران وفاقی تحقیقاتی ادارے (ایف آئی اے) کے پراسیکیوٹر نے عدالت کے باہر رینجرز تعینات کرنے کی درخواست کردی۔کراچی کی بینکنگ کورٹ میں منی لانڈرنگ کی سماعت کے دوران سابق صدر آصف علی زرداری اور ان کی ہمشیرہ فریال تالپور کی پیشی کے موقع پر کمرہ عدالت میں شدید بدنظمی دیکھی گئی۔عدالت کے باہر پیپلز پارٹی کے کارکنان کی بڑی تعداد موجود تھی اور کمرہ عدالت بھی پیپلز پارٹی کے رہنماؤں و کارکنان سے کچھا کچھ بھرا رہا۔اس موقع پر ایف آئی اے پراسیکیوٹر بختیار احمد چنہ نے شکوہ کیا کہ اس صورتحال میں کیس کیسے چلا سکتا ہوں، عدالت اس صورتحال پر کارروائی کرے۔پراسیکیوٹر نیب نے عدالت کو تحفظات سے آگاہ کرتے ہوئے عدالت کے باہر رینجرز تعینات کرنے کی درخواست کی اور کہا کہ ایف آئی اے دھکم پیل کی صورتحال میں کیسے اپنا دفاع کرے، رش کے باعث سیکیورٹی کے مسائل بھی پیدا ہو رہے ہیں۔یاد رہے کہ بینکنگ کورٹ نے منی لانڈرنگ کیس میں سابق صدر آصف علی زرداری اور ان کی ہمشیرہ فریال تالپور کی عبوری ضمانت میں 23 جنوری تک مزید توسیع کردی۔
منی لانڈرنگ کیس: ایف آئی اے کی عدالت کے باہر رینجرز تعینات کرنے کی درخواست
