جعلی اکاؤنٹس کیس: آصف زرداری اور فریال تالپور احتساب عدالت میں پیش

اسلام آباد: سابق صدر آصف علی زرداری، ان کی ہمشیرہ اور دیگر ملزمان کے خلاف جعلی بینک اکاؤنٹس سے متعلق نیب ریفرنس کی سماعت 29 اپریل تک ملتوی کردی گئی۔احتساب عدالت کے جج ارشد ملک نے نیب ریفرنس کی سماعت کی تو آصف زرداری اور فریال تالپور دوسری مرتبہ عدالت میں پیش ہوئے۔احتساب عدالت نے آصف زرداری، ان کی ہمشیرہ فریال تالپور، حسین لوائی، انور مجید، عبدالغنی مجید، عدیل شاہ راشدی اور اقبال آرائیں سمیت 30 ملزمان کو طلب کیا تھا۔سماعت شروع ہوئی تو پراسیکیوٹر نیب سردار مظفر عباسی نے عدالت کو بتایا کہ 5 ملزمان زیر حراست اور ملیر جیل میں قید ہیں جنہیں پیش نہیں کیا جاسکا۔سردار مظفر عباسی نے کہا جن حکام کو انہیں پیش کرنا تھا انہیں ہدایت دی جائے جس پر عدالت نے چیف سیکرٹری سندھ کے ذریعے ملزمان کی طلبی کے دوبارہ سمن جاری کردیے۔