بالی وڈ کی مقبول شخصیات روینہ ٹنڈن، فرح خان اور بھارتی سنگھ کیخلاف ایف آئی آر درج

بالی وڈ کی معروف شخصیات اداکارہ روینہ ٹنڈن، ہدایت کار فرح خان اور کامیڈین بھارتی سنگھ کے خلاف ایف آئی آر درج کر لی گئیں۔بھارتی میڈیا کے مطابق روینہ ٹنڈن، فرح خان اور بھارتی سنگھ کے خلاف کامیڈی ٹی وی شو میں اقلیتی برادری کے مذہبی جذبات کو ٹھیس پہنچانے کے الزام میں ایف آئی آر درج کی گئی ہیں۔تفصیلات کے مطابق بالی وڈ کی معروف شخصیات کے خلاف کرسچن فرنٹ آف اجنالا بلاک کے صدر کی طرف سے کرسمس تہوار کے موقع پر نشر ہونے والے کامیڈی ٹی وی شو میں مذہبی جذبات کو ٹھیس پہنچانے کی شکایت پر مقدمہ درج کیا گیا ہے۔بالی وڈ کی تینوں شخصیات پر انڈین پینل کوڈ (آئی پی سی) کی دفعہ 295 اے کے تحت مقدمہ درج کیا گیا ہے جس کا تعلق مذہب کی توہین یا مذہبی جذبات کو مجروح کرنے سے ہے۔اسی ضمن میں مدعی نے شو کی ویڈیو کلپس بھی جمع کروائے ہیں جن میں یہ الزام لگایا گیا ہے کہ عیسائی برادری کے مذہبی جذبات مجروح ہوئے ہیں۔اس حوالے سے پولیس کا کہنا ہے کہ وہ مزید تحقیقات کر رہے ہیں۔دوسری جانب ایف آئی آر درج کرنے پر بالی وڈ اداکارہ روینہ ٹنڈن نے صفائی پیش کرتے ہوئے مائیکرو بلاگنگ سائٹ پر ایک پوسٹ شیئر کی۔روینہ ٹنڈن نے اپنی پوسٹ میں لکھا کہ آپ تمام لوگ اس ویڈیو کو دیکھیں، ہم تینوں میں سے کسی نے بھی کسی کے جذبات کو ٹھیس نہیں پہنچائی، اگر پھر بھی ہم نے ایسا کیا ہے تو تکلیف پہنچانے پر دل سے معافی مانگتے ہیں۔علاوہ ازیں بالی وڈ ہدایت کارہ فرح خان نے بھی ٹوئٹر پیغام کے ذریعے سب سے معافی مانگتے ہوئے کہا کہ میں بہت افسردہ ہوں کہ میرے شو کے ذر یعے سے کسی کو تکلیف پہنچی، میں تمام مذاہب کی عزت کرتی ہوں اور یہ قطعی میں نے جان بوجھ کر نہیں کیا، میں اپنی پوری ٹیم کی طرف سے دل سے معافی مانگتی ہوں۔