لاہور: داسو حملے کی تحقیقات میں پولیس نے واقعے میں ملوث ہونے کے شبے میں لاہور سے دو بھائیوں کو حراست میں لے لیا، گرفتار دونوں بھائیوں کا تعلق کوئٹہ سے ہے۔
تفصیلات کے مطابق داسو حملہ اور جوہر ٹاون دھماکے کی کڑیاں ملنے لگیں ، دونوں حملوں میں ملوث ٹیم کا تعلق بھارتی حفیہ ایجنسی راسےثابت ہو رہا ہے۔
ذرائع کا کہنا ہے کہ داسوحملے میں ملوث ہونے کے شبے میں لاہور سے 2مشتبہ افراد کو گرفتار کرلیا گیا ہے ،گرفتار دونوں بھائیوں کا تعلق کوئٹہ سے ہے۔
ذرائع کے مطابق داسو حملے میں استعمال گاڑی لاہور میں مقیم شخص کی ملکیت تھی۔
یاد رہے داسو پاور پراجیکٹ کی بس میں دھماکہ ہوا تھا اور حادثے میں 9 چینی باشندے اور 3 پاکستانی باشندے جاں بحق ہوگئے تھے۔
حکومت پاکستان نے داسو پاور پراجیکٹ کی بس حادثے میں بارودی مواد کے استعمال کی تصدیق کرتے ہوئے کہا تھا کہ واقعہ میں دہشت گردی کے عنصر سے انکار نہیں کیا جاسکتا۔
بعد ازاں داسو بس دھماکے کی تحقیقات کیلئے چینی حکام بھی پاکستان پہنچے تھے وزیرداخلہ شیخ رشید کا کہنا ہے کہ داسو واقعہ میں ملوث افراد کو کیفر کردار تک پہنچائیں گے۔
خیال رہے جوہر ٹاؤن دھماکے میں ملوث تمام نیٹ ورک پکڑا گیا تھا اور ذرائع کا کہنا تھا کہ دھماکے کے پیچھے بھارتی ایجنسی را اورافغان این ڈی ایس کا ہاتھ ہے۔