کشمیر پریمیر لیگ میں میرپور رائلز نے سپر اوور میں کوٹلی لائنز کو شکست دے کر کوٹلی لائنز کو پلے آف کی دوڑ سے باہر کروا دیا ہے۔ احسان علی کے ۹۹ رنز کوٹلی لائنز کو کامیابی نہ دلواسکے۔
پوائنٹس ٹیبل کی آخری دو درجوں پر موجود ٹیموں کے درمیان معرکہ آرائی میں میرپورلائنز نے سنسنی خیز انداز میں میچ ٹائی کیا اور پھر شعیب ملک کی باوٴنڈری نے میرپور رائلز کی جیت کا اعلان کردیا۔
https://twitter.com/kpl_20/status/1425543546376015875
کوٹلی لائنز نے ٹاس جیت کر پہلے اپنے بولرز کو آزمانے کا فیصلہ کیا تو شرجیل خان (12) کو گنوانے کے بعد مختار احمد اور محمد اخلاق نے 99 رنز کی شراکت قائم کرتے ہوئے ایک بڑے مجموعے کی نوید سنا دی۔ مختار احمد نے چھ مرتبہ گیند کو باوٴنڈری کی راہ دکھانے کے ساتھ ساتھ تین چھکے لگاتے ہوئے 38بالز پر 61 رنز کی ایک اور بڑی اننگز کھیلی۔ محمد اخلاق پانچ رنز کی کمی سے نصف سنچری مکمل نہ کرسکے مگر 28گیندوں پر چھ چوکے اور ایک چھکا لگاتے ہوئے انہوں نے مختار احمد کا خوب ساتھ دیا۔
کپتان شعیب ملک نے روایتی انداز میں 19گیندوں پر ایک چوکے اور ایک چھکے سمیت 28*رنز بنائے لیکن دوسری طرف خوش دل شاہ نے آخری اوور میں بولرز کا بھرکس نکالتے ہوئے صرف 13گیندوں کا سامنا کرتے ہوئے تین چوکے اور چار زوردار چھکوں کی مدد سے تماشائیوں کو بھرپور لطف فراہم کیا۔ میرپور رائلز نے 211رنز کا مجموعہ سجا دیا جبکہ کوٹلی لائنز کیلئے مجتبیٰ غیاص نے دو وکٹیں اپنے نام کیں۔
https://twitter.com/kpl_20/status/1425535564531609605
ایک بڑے مجموعے کے تعاقب میں کوٹلی لائنز کا آغاز مثبت تھا۔ پہلے تیسرے اوور میں اسکور 31تک پہنچ چکا تھا کہ سلمان ارشاد نے 14رنز بنانے والے سلمان ارشاد کو بولڈ کردیا۔ عبداللہ سید بھی دو چھکے لگانے کے بعد 16رنز کے ساتھ سلمان ارشاد کا دوسرا شکار بن گئے۔ احسان علی کو تجربہ کار کشمیری بیٹسمین حسن رضا کا ساتھ ملا تو باوٴنڈریز لگانے کی رفتار میں بھی اضافہ ہوگیا۔
نویں اوور میں 88کے مجموعی اسکور پر حسن رضا دو چوکوں اور تین چھکوں کی مدد سے 21بالز پر 34رنز بنا کر رن آوٴٹ ہوئے تو 56 رنز کی شراکت کا بھی خاتمہ ہوگیا۔ آصف علی (2) کو آوٴٹ کرکے سلمان ارشاد نے کوٹلی لائنز کو گہری چوٹ پہنچائی لیکن احسان علی کا بلا رکنے کا نام نہیں لے رہا تھا جنہوں نے سیف بدر کے ساتھ 14ویں اوور میں کوٹلی لائنزکے 150 رنز مکمل کردیے۔ 14ویں اوور کی مسلسل دو گیندوں پر عماد بٹ نے سیف بدر (22) اور خالد عثمان (صفر) کو پویلین بھیج کر سنسنی پھیلا دی۔ کوٹلی لائنز کی اخری امید احسان علی تھے جو 85* تک پہنچ چکے تھے اور آخری تین اوورز میں 29رنز کی ضرورت تھی۔
https://twitter.com/kpl_20/status/1425532089634525185
احسان علی نے 47 بالز پر دس چوکے اور چھ چھکے لگائے مگر اٹھارہویں اوور کی آخری گیند پر شاداب مجید نے 99کے انفرادی اسکور پر احسان علی کو آوٴٹ کردیا۔ اخری اوور میں آٹھ رنز درکار تھے اور پھر صورتحال ایک گیند، ایک رن پر پہنچ گئی۔ شاداب مجید کی گیند پر مجتبیٰ غیاص نے ایک رن لینے کی کوشش کی تو شعیب ملک نے مجتبیٰ کو رن آوٴٹ کرکے میچ کو سپر اوور میں داخل کروادیا۔ سلمان ارشاد نے تین اور عماد بٹ نے دو وکٹیں حاصل کیں۔
سپر اوور میں کوٹلی لائنز کے بیٹسمین صرف دو ہی رنز بنا سکے جس کی وجہ میرپور لائنز کی عمدہ فیلڈنگ تھی۔ تین رنز کے تعاقب میں کپتان شعیب ملک نے پہلی ہی گیند پر چوکا لگا کر میرپور کو اہم کامیابی دلوادی جبکہ اس شکست کے بعد کوٹلی لائنز کی ٹیم پلے آف کی دوڑ سے باہر ہوگئی ہے۔