وزیراعظم اپنی مدت پوری کریں گے، عمران خان کا متبادل نہیں ہوں، اسد عمر
وفاقی وزیر منصوبہ بندی و سربراہ نیشنل کمانڈ اینڈ آپریشن سنٹر(این سی او سی) اسد عمر نے کہا ہے کہ وزیراعظم اپنی مدت پوری کریں گے۔ عمران خان کا متبادل نہیں ہوں ۔
حکومت کے جانے کی خبریں چائے کی پیالی میں طوفان کے سوا کچھ نہیں۔ عمران خان نہ ہوتے تو سیاست میں نہ آتا۔ پی ٹی آئی میں کوئی بھی عمران خان کی لیڈرشپ پر سوال نہیں اٹھا سکتا۔ ایسا کوئی کیس نہیں دیکھا کہ عمران خان کی لیڈر شپ کو چیلنج کیا گیا ہو۔
وفاقی وزیر منصوبہ بندی و سربراہ نیشنل کمانڈ اینڈ آپریشن سنٹر(این سی او سی) اسد عمر نے نجی ٹی وی خصوصی گفتگو کرتے ہوئے کہا کہ نون لیگ میں ووٹ صرف نواز شریف کا اور تحریک انصاف میں عمران خان کا ہے۔
انہوں نے کہا کہ پارلیمانی نظام میں کسی بھی حکومت کی گارنٹی نہیں ہوتی۔ پی ڈی ایم کی پہلی تحریک پیالی میں طوفان ثابت ہوئی تھی۔ کوشش کی جا رہی ہے طوفان کو واپس پیالی میں لایا جائے۔ نواز شریف نااہل اور بیرون ملک ہیں لیکن انہیں پتہ ہے پارٹی نواز شریف کی ہے۔ اس بات کا علم شہباز شریف کو ہے جو پاکستان میں ہیں۔
انہوں نے کہا کہ خیبرپختونخوا بلدیاتی الیکشن میں سب سے زیادہ ووٹ پی ٹی آئی کو پڑے۔ ن لیگ، ایاین پی، پیپلزپارٹی سے زیادہ پی ٹی آئی نے تحصیلیں جیتیں، تینوں جماعتیں پہلے بھی خیبرپختونخوا میں حکومت بناچکی ہیں۔ وفاقی وزیر نے مزید کہا کہ بلدیاتی انتخابات میں وہ نتائج نہیں ملے جس کی ووٹرز اور ورکرز کو امید تھی۔