ترک صدارتی انتخابات میں طیب اردوان فتح یاب

انقرہ: ترکی کی تاریخ میں پہلی مرتبہ ایک ساتھ ہونے والے صدارتی اور پارلیمانی انتخابات میں ترک صدر رجب طیب اردوان اور ان کی جماعت جسٹس اینڈ ڈویلپمنٹ پارٹی نے کامیابی حاصل کرلی ہے۔ترک صدارتی انتخاب میں ووٹوں کی گنتی مکمل ہوچکی ہے جس کے مطابق تقریباً 53 فیصد ووٹ طیب اردوان نے حاصل کیے۔ اپوزیشن امیدوار محرم انجے 31 فیصد ووٹ لے کر دوسرے نمبر پر ہیں۔فتح کے بعد ریلی سے خطاب میں ان کا کہنا تھا کہ عوام نے مجھے صدارت کے لیے مینڈیٹ دے دیا ہے۔انہوں نے کہا کہ عدلیہ پر اعتبار بڑھانے کےلیے اقدامات جاری رہیں گے۔ترکی کے مقامی وقت کے مطابق پولنگ صبح 8 بجے شروع ہوئی جو شام 5 بجے تک بلاتعطل جاری رہی اور پاکستانی وقت کے مطابق شام 7 بجے ووٹنگ کا عمل مکمل ہوا۔