واشنگٹن ۔۔۔امریکی جریدے فارن پالیسی نے ایک رپورٹ میں دعویٰ کیا ہے کہ صدر ڈونلڈ ٹرمپ نے فلسطینی پناہ گزینوں کی بہبود کے ذمہ دار ادارے’’اونروا‘‘ کے تمام فنڈزختم کرنے کا فیصلہ کیا ہے۔امداد بند کرنے کا فیصلہ اگست کے شروع میں صدر ٹرمپ، ان کے داماد جارڈ کوشنر اور وزیرخارجہ مائیک پومپیو کے درمیان ہونے والی ایک ملاقات میں کیا گیا۔ذرائع کا کہنا ہے کہ امریکی حکومت نے اپنے اس فیصلے سے مختلف حکومتوں کو بھی آگاہ کر دیا ہے۔امریکی وزارت خارجہ کی طرف سے جب اس پر رد عمل معلوم کرنے کی کوشش کی گئی تو اس کی تصدیق یا تردید نہیں کی گئی تاہم اس کا کہنا ہے کہ ’اونروا‘ کی امداد جاری رکھنے یا ختم کرنے کا معاملہ فی الحال حکومت کے ہاں زیربحث ہے۔
