مودی حکومت کا کشمیر معاملے پربھارتی مسلمانوں پر پاکستان کی حمایت کا الزام

نئی دہلی: بھارتی حکومت نے اپنے ملک میں بسنے والے مسلمانوں پر کشمیر کے معاملے میں پاکستان کی حمایت کرنے کا الزام عائد کردیا۔وزیر برائے ترقی انسانی وسائل پرکاش جاوادیکر نے کانگریس کے سابق صدر راہول گاندھی کو ہدف تنقید بناتے ہوئے کہا کہ انہوں نے حکومتی پالیسی پر تنقید اس لیے کی تاکہ پاکستان کو اقوامِ متحدہ میں ‘جواز’ فراہم کریں اور اس لیے بھی تاکہ اپنے مسلمان اکثریت والے حلقے کو راضی کرسکیں۔بھارتی وزیر کا کہنا تھا کہ ‘راہول گاندھی نے کہا کہ کشمیر میں معاملات ٹھیک نہیں اور اطلاعات ہیں کہ لوگ مررہے ہیں، آپ غلط ہیں راہول گاندھی کشمیر میں میں سب صحیح ہے نہ وہاں تشدد ہے نہ لوگ مررہے ہیں’۔ان کا مزید کہنا تھا کہ ‘پاکستان نے اقوامِ متحدہ کو لکھی گئی درخواست میں ان کا بیان شامل کیا اور کہا کہ کشمیر میں تشدد کے واقعات کو بھارتی اپوزیشن رہنما نے بھی تسلیم کیا ہے’۔پریس کانفرنس میں راہول گاندھی پر حملہ کرنے کے ساتھ ساتھ انہوں نے راہول گاندھی کے لوک سبھا کے حلقے ‘وایاند’ کا استعمال کرتے ہوئے بھارتی مسلمانوں پر فرقہ واریت تبصرہ بھی کیا۔بھارتی وزیر نے کہا کہ راہول گاندھی نے کشمیر کے حوالے سے تنقیدی ریمارکس اپنی ‘ووٹ بینک’ سیاست کی وجہ سے دیے اور حیرانی کا اظہار کیا کہ کیا ان کی ‘ذہنیت’ نئے حلقے سے الیکشن لڑنے کی وجہ سے ہے۔