کراچی: صدر آپریشن میں ایک ہزار سے زائد دکانیں گرادیں: ڈائریکٹر انسداد تجاوزات

کراچی: ڈائریکٹر اینٹی انکروچمنٹ بشیر صدیقی کا کہنا ہےکہ آپریشن میں اب تک ایک ہزار سے زائد دکانیں مسمار کی جاچکی ہیں اور دوسرے مرحلے میں ایمپریس مارکیٹ کے اندر کارروائی ہوگی۔کراچی کے علاقے صدر میں تجاوزات کے خلاف آپریشن جاری ہے تاہم دکانیں مسمار کیے جانے کےبعد ملبہ اب بھی سڑک پر موجود ہے۔ڈائریکٹر اینٹی انکروچمنٹ بشیر صدیقی کے مطابق اب تک ایک ہزار سے زائد دکانیں مسمار کی جاچکی ہیں، فٹ پاتھ پر قائم 280 دکانیں بھی ہٹادیں گئی ہیں۔ڈائریکٹر اینٹی انکروچمنٹ کا کہنا ہےکہ ایمپریس مارکیٹ کے باہر سے تجاوزات ختم ہونے کے بعد اندر کارروائی ہوگی جب کہ اس حوالے سے ایک ٹاسک فورس بھی بنائی گئی ہےتاکہ دوبارہ تجاوزات قائم نہ ہوں۔بشیر صدیقی نے بتایا کہ ایمپریس مارکیٹ اور اطراف میں آج ملبہ اٹھانے کا کام جاری رہے گا۔