ہنوئی۔۔۔امریکی صدر ٹرمپ نے اتوار کو ایک ٹوئٹ میں کہا ہے کہ شمالی کوریا کے رہنما کم جونگ اُن نے مجھے ’’ بوڑھا ‘‘ کہہ کر میری توہین کی ہے ۔ انہوں نے کہا کہ اس کے باوجود میں کم کو موٹا اور چھوٹا نہیں کہوں گا۔انہوں نے یہ ریمارکس ویتنام میں ایشیائی بحرالکاہل اقتصادی تعاون تنظیم ( ایپک ) کی سربراہ کانفرنس کے بعد دئیے ۔ اپنے مختلف ٹوئٹس میں انہوں نے کہا کہ چین کے صدر شمالی کوریا پر اس کے ایٹمی اور میزائل پروگرام کو فروغ دینے کی وجہ سے پابندیوں میں اضافہ کر رہے ہیں ۔ وہ چاہتے ہیں کہ پیانگ یانگ ایٹمی قوت سے پاک ملک بنے ۔ اپنے ایک اور ٹوئٹ میں انہوں نے سوال کیا کہ آخر کم نے مجھے بوڑھا کہہ کر میری توہین کیوں کی جبکہ میں نے تو انہیں چھوٹا اور موٹا بھی نہیں کہا ۔ میں نے تو ان کا دوست بننے کی کوشش کی تھی اور شاید وہ کسی دن وہ میرے دوست بھی ہو جائیں ۔انہوں نے کہا کہ اگر وہ میرے دوست ہو جائیں تو یہ بات بہت ہی اچھی ہو گی ۔ واضح رہے کہ ٹرمپ ماضی میں کم کا مذاق اڑاتے رہے ہیں اور ساتھ میں دھمکیاں بھی دیتے رہے ہیں ۔
