اسلام آباد: ملک بھر میں میلادالنبی صلی اللہ علیہ وآلہ وسلم کی تیاریاں عروج پر ہے جب کہ وفاقی حکومت کے زیر اہتمام اسلام آباد میں 2 روزہ سیرت کانفرنس جاری ہے۔ملک بھر میں میلادالنبی ﷺ کی مناسبت سے درود و سلام کی محفلیں سجائی جارہی ہیں جب کہ گھروں اور سرکاری عمارتوں کو برقی قمقموں سے سجا دیا گیا ہے۔آرائشی سامان کے اسٹالز اور دکانوں پر رش بڑھ گیا جہاں سے خریدار نعلین پاک کی شبیہ کے بیجز، جھنڈے اور دیگر چیزیں خرید رہے ہیں۔دوسری جانب وفاقی حکومت کی جانب سے اسلام آباد میں دو روزہ رحمت للعالمین کانفرنس کا انعقاد کیا گیا ہے جس کے افتتاحی سیشن سے وزیراعظم عمران خان نے خطاب کیا۔سیرت کانفرنس میں علماء اور مشائخ سمیت بیرون ملک سے نامور مذہبی شخصیات شرکت کررہی ہیں اور کانفرنس میں سیرت طیّبہ کے مختلف پہلوؤں پر روشنی ڈالی جائے گی۔
