شادی میں جھگڑا، ون پاؤنڈ فش کے سنگر شاہد نذیر بھی تشدد سے زخمی

قصور: پتوکی میں معمولی تلخ کلامی پر شہریوں اور باراتیوں کے درمیان جھگڑا ہوگیا جس سے شادی ہال میدان جنگ بن گیا جب کہ لڑائی میں ون پاونڈ فش سے شہرت پانے والے شاہد نذیر سمیت 15 سے زائد افراد زخمی ہوگئے۔پولیس کے مطابق قصور کے علاقے پتوکی کے ایک شادی ہال میں آئے باراتیوں اور مقامی لوگوں میں معمولی تلخ کلامی ہوئی جو لڑائی میں بدل گئی اور لاٹھیاں بھی چل گئیں۔پولیس کا کہناہےکہ واقعے میں 15 سے زائد افراد زخمی ہوگئے اور زخمیوں میں ون پاونڈ فش گانے سے شہرت پانے والے شاہد نذیر بھی شامل ہیں۔شاہد نذیر نے الزام لگایا کہ ان کے بیٹے کی موٹر سائیکل باراتیوں کی گاڑی سے ٹکرائی تو انہوں نے تشدد کیا، بیٹے کو بچانے شادی ہال پہنچا تو باراتیوں نے انہیں بھی تشدد کا نشانہ بنا دیا۔پولیس نے واقعے میں زخمی ہونے والوں کو اسپتال منتقل کرکے کارروائی شروع کر دی۔