جنوبی افریقہ اور ویسٹ انڈیز کے درمیان ورلڈ کپ کا 15 واں میچ آج یعنی پیر کو انگلینڈ کے شہر ساؤتھمپٹن میں کھیلا جائے گا۔
کرکٹ ورلڈکپ مقابلوں میں ویسٹ انڈیز اور جنوبی افریقہ کی ٹیمیں چھ مرتبہ آمنے سامنے آئیں۔ ان مقابلوں میں جنوبی افریقہ کا پلڑا ہمیشہ بھاری رہا۔
چار بار جنوبی افریقہ نے میدان مارا جبکہ دو مرتبہ ویسٹ انڈیز کو کامیابی حاصل ہوئی۔دونوں ٹیموں کے درمیان پہلا معرکہ 1992 کے ورلڈ کپ میں ہوا جس میں ساؤتھ افریقہ نے ویسٹ انڈیز کو 64 رنز سے شکست دی۔
1996 کے ورلڈ کپ میں دوسری مرتبہ ویسٹ انڈیز نے 19 رنز سے ساؤتھ افریقہ کو زیر کیا، تیسری مرتبہ 2003 میں مقابلہ ہوا تو ویسٹ انڈیز نے جنوبی افریقہ کو سنسی خیز مقابلے کے بعد دھول چٹائی۔
چوتھی مرتبہ 2007 کے ورلڈ کپ میں دونوں ٹیمیں آمنے سامنے آئیں تو جنوبی افریقہ نے ویسٹ انڈیز کے خلاف 67 رنز سے فتح پائی۔
پانچویں بار دونوں ٹیمیں 2011 میں مدمقابل ہوئیں تو جنوبی افریقہ نے ویسٹ انڈیز کو بآسانی 7 وکٹ سے ہرا دیا۔
2015 کے ورلڈ کپ میں ویسٹ انڈیز کو 257 رنز سے جنوبی افریقہ کے ہاتھوں عبرتناک شکست ہوئی۔
تاہم اس بار ویسٹ انڈیز کی ٹیم بہت اچھا پرفارم کر رہی ہے جبکہ جنوبی افریقہ اپنے ابتدائی تینوں میچ ہار کر پریشر میں ہے۔
دیکھتے ہیں کہ آج قسمت کی دیوی کس پر مہربان ہوتی ہے۔
