ٹرمپ نے 'خلائی فورس' بنانے کا اعلان کردیا

واشنگٹن: امریکی صدر ڈونلڈ ٹرمپ نے چاند، مریخ اور خلاء پر امریکی بالادستی کے حصول کے لیے خلائی فورس بنانے کا اعلان کردیا۔
خبر رساں ادارے رائٹرز کے مطابق صدر ٹرمپ کا کہنا تھا کہ ہم خلاء میں بھی قیادت کریں گے اور خلائی فورس زمین کے باہر بھی ہماری بالادستی کو یقینی بنائے گی۔
وائٹ ہاؤس میں ایک تقریب کے موقع پر ڈونلڈ ٹرمپ کا کہنا تھا کہ ‘خلائی فورس’، ایئر فورس سے علیحدہ لیکن برابر کی فورس ہوگی۔
ساتھ ہی ان کا کہنا تھا کہ چین اور روس سے پہلے ہم خلاء میں موجود ہوں گے۔
ڈونلڈ ٹرمپ کے اس اعلان کے بعد ٹوئٹر صارفین کی جانب سے بھی ردعمل سامنے آیا۔
ایک صارف نے لکھا، ‘میرا خیال ہے کہ کسی نے بالآخر ڈونلڈ ٹرمپ کو خلائی مخلوق کے بارے میں بتا دیا ہے، یہی وجہ ہے کہ اب ان کا خیال ہے کہ ہمیں اسپیس فورس کی ضرورت ہے۔’