فرانس میں جیل سے مجرم کا فلمی انداز میں فرار، 'کمانڈو طرز ایکشن' میں 10 منٹ لگے

پیرس: فرانس میں جیل سے ایک مجرم کا فلمی انداز میں فرار ہونے کا واقعہ پیش آیا ہے، جہاں گینگسٹر ریڈوئن فائد کے 2 مسلح ساتھیوں نے پہلے ہیلی کاپٹر ہائی جیک کیا، پھر اسموک بم اور گرائنڈر کی مدد سے جیل کے اندر جا گھسے اور ساتھی کو فرار کرا لیا،کمانڈو طرز کی اس کارروائی میں 10 منٹ سے بھی کم لگے۔ جیل سے سزا یافتہ 46 سالہ ریڈوئن فائد کے 2 ساتھی اسموک بموں اور گرینڈر کی مدد سے پیرس کے جنوب مشرقی علاقے میں واقع جیل کے اندر جا پہنچے، اُس وقت ڈیوٹی پر موجود وارڈن مسلح نہیں تھے۔رپورٹ کے مطابق وارڈنز نے بھاگ کر جان بچائی اور الارم بجائے، تاہم ملزمان مجرم ریڈوئن کو لے کر ہیلی کاپٹر میں بیٹھ کر فرار ہو گئے۔کارروائی میں استعمال ہونے والا ہیلی کاپٹر ایک فلائٹ انسٹرکٹر سے ہائی جیک کیا گیا تھا، جس نے جیل کی حدود میں صبح 11 بجکر 15 منٹ پر لینڈ کیا، جو بعدازاں پیرس کے شمال مشرقی علاقے میں ایک جگہ پر موجود پایا گیا۔