تحریک انصاف آج جھنگ، فیصل آباد اور سیالکوٹ میں عوامی طاقت کا مظاہرہ کریگی

لاہور: پاکستان تحریک انصاف کی جانب سے آج پنجاب کے تین شہروں میں جلسوں کا انعقاد کیا جارہا ہے جس سے پارٹی چیئرمین عمران خان خطاب کریں گے۔تحریک انصاف کی جانب سے جاری اعلامیے کے مطابق چئیرمین تحریک انصاف عمران خان آج دوپہر ایک روزہ دورے پر کوئٹہ پہنچیں گے جہاں وہ سانحہ مستونگ کے زخمیوں کی عیادت کریں گے جس کے بعد وہ پنجاب کے تین شہروں میں جلسوں سے خطاب کریں گے۔ انتخابی مہم کے سلسلے میں پی ٹی آئی کی جانب سے آج جھنگ، فیصل آباد اور سیالکوٹ میں عوامی طاقت مظاہرہ کیا جائے گا۔عمران خان سب سے پہلے جھنگ کے مائی ہیر اسپورٹس کمپلکس میں دن 3 بجے پہنچیں گے جہاں وہ کارکنان سے خطاب کریں گے جس کے بعد وہ شام 5 بجے فیصل آباد کے دھوبی گھاٹ گراؤنڈ میں کارکنان کا لہو گرمائیں گے۔ چیئرمین تحریک انصاف آج ہونے والے تیسرے جلسے کے سلسلے میں رات 8 بجے سیالکوٹ کے جناح اسٹیڈیم پہنچیں گے اور خطاب کریں گے۔
تینوں جلسوں کے لئے تیاریاں آخری مراحل میں ہیں جبکہ سیکیورٹی کے بھی انتہائی سخت انتظامات کئے گئے ہیں۔ چیئرمین پی ٹی آئی عمران خان نے ملک بھر میں تمام امیدواروں کو انتخابی مہم مزید تیز کرنے کی ہدایت بھی کی ہے۔