مسلم لیگ ن کی رہنما مریم نواز کا کہنا ہے کہ عمران خان کا نام کشمیر فروش ہے، جس نے سار ی زندگی کھیل تماشے میں گزاری اسے خارجہ پالیسی کا کیا پتا۔
مظفرآباد میں جلسے سے خطاب کرتے ہوئے مریم نواز کا کہنا تھا کہ کشمیر میرے خون کےاندر ہے، لوگ انتخابی مہم کے لیے آتے ہیں لیکن کشمیر میرے دل میں رہتا ہے۔
وزیراعظم کو تنقید کا نشانہ بناتے ہوئے مریم نواز کا کہنا تھا کہ عمران خان کا نام کشمیر فروش ہے، عمران خان مقبوضہ کشمیر بھارت کی جھولی میں ڈال کر آگیا ہے، یہ جتنا ڈراما کریں، روئیں دھوئیں، اس میں عمران کی مرضی شامل تھی، کشمیر فروشی کے بعد تم کیا منہ لےکر کشمیر میں آرہے ہو۔
ان کا کہنا تھا عمران خان سے پوچھنا چاہتی ہوں تمہیں کشمیریوں کا خون بیچنے کا حق کس نے دیا؟ ماں بیٹیوں کی عزت لوٹی گئی، ان کی قربانیوں کو یوں بہانے کا حق کس نے دیا؟ مقبوضہ کشمیر کے بعد اب کشمیر کو کاٹنے کی تیاری ہو رہی ہے۔
انہوں نے کہا کہ جس شخص نے ساری زندگی کھیل کود میں گزار دی، وہ کیا جانے خارجہ پالیسی کیا ہوتی ہے، جس بلے سے کھیلتا تھا اس سے ہی عوام کو مار رہا ہے۔
